كتير مننا كامهات فاكرين ان الاحترام
ان ابنى يحترمنى
امال اية
..
الا اكون انا اللى هحترمة؟؟
هنا باة المشكلة لان معاليكى مش فاهمة يعنى اية
ان انا احترم ابنى قبل ماهو يحترمنى يقوم هو يحترمنى
حد فاهم حاجة؟؟؟.
بالراحة علية انا فهمكم؟؟؟.
.
لازم نفهم ان الاحترام لازم يكون من الطرفين
عشان لما ابنك يكبر يعرف يحترم الناس وتخلىى الناس تحترمة
اى شخص ف الدنيا انا وانتى وابنى وجوزى وكله بنحب نحس بقيمتنا واحترام الناس لينا
ابنك باة بيحب يحس بكدة واكتر مما تتخيلى
بس مننا كتيير ما بتعرفش تخلى ابنها يحترمها بايجابية
عارفة يحترمك بايجابية دى يعنى اية
يعنى مايكونش مفروض عليه انة يحترمك بالضرب ويسمع كلامك لما تبرقيلة
ولا يكتب الواجب لما تجرى وراة بالشبشب
فكرتونى بمناسبة الشبشب بيبقى شكلنا وحش اوى واحنا بنجرى وراهمِ
بحس ان العيال بتقول يالهوى اجرى ياوله ماما اتهبلت
اة والنعمة
وعشان ابنك يحترمك صح مش بالشبشب
اسمعى منى
...
1.
احترمى اهل جوزك ...لا ياختى مش صعبة ولا حاجة
.احترمى ابوه ادامه واحترمى جيرانك واحترمى اهلك
2..حبى ابنك ولاعبية ودلعية بس دايما اعملى حد للعلاقة والهزار بينك وبينه
وخاصة لو بتهزرى مع ولادك بالشتيمة
اه بالشتيمة لما تقوليله امشى ياكلب ماهو هييجى يهزر معاكى هيقولك اية امشى ياعصفورة
3..لماتطلبى طلب اطلبية منة بصيغة الطلب مش بالامر
يعنى مش قومى يابت هاتيلى اشرب لاء هو احنا هنا ف مسلسل نحن لانزرع الشوك
لاء قولى ممكن يا........تجيبلى اشرب
4..اوعى تتريقى على حد ادامة ماهو هيعمل زيك وياما يتريق عليكى او على اللى انتى اتريقتى علية مانا نسيت اقولك انك انتى القدوة بتاعتة
5..ماتعليش صوتك وتصوتى وتشتمى ويالهوى ربنا ياخدنى ومش عارفة ايه لانه هيتعلق ف
دماغة ان دى لغة الحوار العادى
يقوم اية يتعامل زيك كدة مع كل الللى حواليه
6..بينيله حبك واهتمامك واحترامك وخدى رايه فى اى موضوع او اى حاجة
مانا عارفة انه مش فاهم حاجة؟؟
بس كدة وكدة يعنى يقوم يحس بقيمة نفسه يقوم اية يحترمك عشان انتى احترمتيه
7..لازم توصلى معاه انة يحترمك مش يخاف منك ودة الفرق بينهم كبير جدا
8..خليكى سره ومؤتمنه علية لانك لو افشيتى سره واستهترتى بكلمة قالها بينك وبينة او فضحتية بموقف عمله وانتى عديتيهوله مش لازم تحكيه لابوه لما ييجى ومامتك لما تتصل واختك لما تزورك وجارتك وانتى مقابلاها ع السلم
فاهمة ولا لاء
9..لو غلطتى ادامه سواء فيه او ف باباه مثلا لازم يسمعك بتعتذرى عشان يتعلم السلوك ده
ويتعلم كمان يعتذر كدة انتى مابتقللليش من نفسك لاء اتنتى بتعلمية معنى انا ايف
10..افهمى ابنك واديله مساحة لشخصيته واديله مساحة للاختيار والتفكير
يقوم ثقته ف نفسة وفيكى تزيد
11..اتفاهمى معاة على ادة بس مش تعملى اراجوز يعنى لاء اتكلمى معاة بكلام واضح وطريقة واضحة عشان
هى دى الطريقة اللى هيتكلم معاكى بيها
12..وانتى بتكلمية بصى ف عنية وكلمية بكلام بسيط يفهمة
ماتعقديش كلامك ولا تتكلمى بسرعة
13...كافئية لما يعمل حاجة صح عشان تخلوا بينكم حاجة ايجابية تخلية بعد كدة يحترمك صح لانة
كدة فاهم انك ملاحظة مجهوده ومقدراه فيزود دة عشان يحس بقيمته عندك ولما هيحس بقيمته عندك
هيحترمك اكتر
14..لما يعمل غلط عاقبية بس بطريقة ايجابية يعنى فهمى العواقب والاخطار والغلط اللى هو
عملة والنتيجة اللى ممكن الغلط دة يوصلنا ليها
وكونى حازمة معاه وخدى موقف منة شوية عشان يفهم ان غلطة بيزعلك وممكن يضيع الحاجة الحلوة اللى بتديهاله
مش الشيبسى ولا الشوكلاتة لاء الحنية والاحترام
15...خليكى صادقة معاه ولو وعدتية بحاجة او خروجة ياتعمليها يا تعتذريلة وتبينيلة السبب
وحطى ف دماغك انة فاهمك
موضوع: ازاى نربى ولادنا صح 
14.08.14 14:30
اوسمة